सूड ,सूड आणि सूड
जिणे हीन केले जयाने जगात ।
तया लेख शत्रू सदा हो मनात ।।
बहु सज्ज होई, त्वरे सूड घ्याया ।
सुडावीण ना मार्ग माने जगाया ।।७८।।
जगी सूड घेता वरी मान येते ।
अरी ध्वंसिता दस्यु होतात जेते ।।
प्रभावी सुडाची जिथे भावना ना ।
तिथे दुःख दारिद्र्य पीडी जनांना ।।७९।।
छळे वालुका मौतिकाचे किड्याला ।
किडा सिद्ध होतो तिला गाडण्याला ।।
सुडाचेच त्या मोती होतात गोल ।
सुडावीण जीवीत हो मातीमोल ।।८०।।
सुडाचे अधिष्ठान जेथे असे ते ।
जिथे दास्यता पार लोपून जाते ।।
असे सूड संजीवनी एक खास ।
मृतप्राय जे राष्ट्र झाले तयास ।।८१।।
सदा स्तब्ध राहून अन्याय साहे ।
न सूडास घ्याया कधी सज्ज राहे ।।
असा जो असे दीन त्या कोण साधू ।
म्हणाया धजे ? नीच तो नीच भोंदू ।।८२।।
- नाना पालकर
